काठमाडौं । हप्ताको तेस्रो दिन आज मंगलबार शेयर बजार परिसूचक नेप्सेमा गिरावट आएको छ । आज नेप्से ४४ दशमलव १८ अंकले घटेर नेप्से परिसूचक २ हजार ९३६ दशमलव ६० विन्दुमा झरेको छ । हिजो सोमबार भने १६१ दशमलव ९४ अंक बढेर २ हजार ९८० दशमलव ७८ विन्दुमा पुगेको थियो ।
मंगलबार नेप्से परिसूचकसँगै कारोबार रकम पनि घटेको छ । हिजो सोमबार ९ अर्ब ८२ करोड ६२ लाख २२ हजार बराबरको १ करोड ७९ लाख २२ हजार ५८८ कित्ता शेयर कारोबार भएकोमा आज मंगलवार रू. ७ अर्ब ४९ करोड ५८ लाख १२ हजारमा खुम्चिएको छ ।
पछिल्लो समय मार्जिन कर्जाको सीमा विवादमा बजारमा उच्च उतारचढाब देखिएको छ । शेयर बजारमा गिरावट आएको भन्दै लगानीकर्ताहरुले गभर्नर महाप्रसाद अधिकारीको राजीनामा समेत माग गरिएको थियो ।
त्यस्तै अर्थमन्त्री जनार्दन शर्माले गभर्नरलाई भेटेर शेयर बजारमा भएको अवस्थाबारे असन्तुष्टिसमेत जनाएका थिए ।
