काठमाडौं- अमेरिकी सहयोग परियोजना मिलेनियम च्यालेन्स कर्पोरेसन (एमसीसी) की उपाध्यक्ष फतिमा सुमारको नेतृत्वको टोलीले आज शुक्रबार प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल (प्रचण्ड) सँग भेट गर्दै छ ।
सुमारको टोलीले सत्तारुढ गठबन्धनका यी दुई नेतासँग भेटेर एमसीसी परियोजनामा भइरहेको ढिलाईबारे चर्चा गर्नुका साथै समसामयीक सन्दर्भमा छलफल गर्ने बताइएको छ ।
सुमारको टोलीले बिहीबार दिउँसो प्रमुख प्रतिपक्षी दल नेकपा एमालेका अध्यक्ष तथा पूर्वप्रधानमन्त्री केपी शर्मा ओलीसँग भेट गरेको थियो ।
एमसीसीकी उपाध्यक्षले एमाले अध्यक्ष ओलीसँग परियोजनाबारेको चासो लिँदै अनुमोदनका लागि सहयोग गर्न आग्रह गरेको भेटमा सहभागी एमालेका विदेश विभाग प्रमुख राजन भट्टराईले जानकारी दिएका छन् । जवाफमा ओलीले सत्तापक्षको पोजिसन स्पष्ट भएपछि धारणा दिने बताएको भट्टराईले जानकारी दिए ।
बिहीबार बेलुका नै सुमारको टोलीले नेकपा एकीकृत समाजवादीका अध्यक्ष माधव नेपालसँग भेट गरेको थियो । नेता नेपालसँगको भेटका क्रममा पनि एमसीसी पास गर्नका लागि सहयोग गर्न आग्रह गरिएको बताएको छ ।
