काठमाडाैं- स्टार खेलाडी नेयमार र एभर्टन रिबेइरोको गोलमा ब्राजिलले दक्षिण अमेरिकी छनोटमा लगातार ८ औँ जित निकालेको छ । शुक्रबार बिहान घरेलु मैदानमा ब्राजिलले पेरुलाई २-० गोल अन्तरले पराजित गरेको हो ।
ब्राजिलको जितमा स्टार खेलाडी नेयमार र एभर्टन रिबेईरोले १/१ गोल गरे । नेयमारले अर्को गोलको लागि पास उपलब्ध गराएका थिए । घरेलु मैदानमा दुबै गोल पहिलो हाफमा भएका थिए । एभर्टनले खेलको १४औँ मिनेटमा नेयमारको पास सदुपयोग गर्दै टोलीलाई अग्रता दिलाएका थिए ।
खेलको ४०औँ मिनेटमा नेयमारले ब्राजिललाई दोहोरो अग्रता दिलाए । बाँकी समय दुबै टोलीले पाएको अवसर सदुपयोग गर्न सकेनन् । जितसँगै कतार विश्वकप छनोट अन्तर्गत दक्षिण अमेरिकी छनोटमा ब्राजिलले ८ खेलमा शतप्रतिशत जित निकाल्दै २४ अंक जोडेको छ । उ खेल तालिकाकाे शीर्ष स्थानमा छ ।
अर्जेन्टिना ८ खेलबाट १८ अंक जोड्दै दोस्रो स्थानमा छ ।
