काठमाडौँ । नेकपा एमालेले शुक्रबारको संसद बैठक पनि चल्न नदिएपछि सभामुख अग्निप्रसाद सापकोटाले संविधानको धारा १ सय ५ को स्मरण गराएका छन् । उनले एमालेका सांसदहरुलाई प्रतिनिधिसभा नियमावली २०७५ को नियम २१ खण्ड ख, ग र घ को नियम पालना गर्न पनि आग्रह गरेका छन् ।
प्रतिनिधिसभा बैठक सुरु हुनेबित्तिकै संसदमा नाराबाजी सुरु भएपछि संसद बैठक १५ मिनेटका लागि स्थगित गरिएको छ । सभामुखको भूमिकाप्रति प्रश्न उठाउँदै नेकपा एमालेले आज पनि संसद अवरुद्ध गरेका थिए ।
उनीहरुले ‘संसदीय मर्यादा कायम गर’, ‘सभामुखको व्यवहार मुर्दावाद’ जस्ता नारा लगाएका छन् । सभामुखले सदन संचालन गर्न सकेका छैनन् ।
एमाले सांसदले नाराबाजी शुरू गरेपछि सभामुख सापकोटाले एमालेले उठाएको प्रश्नको जवाफ दिइसकेकोले बैठक सुचारु गर्न आग्रह गरेका थिए ।
गत बुधबार बसेको संसद बैठकमा पनि एमालेका नेताहरुले अवरोध गरेपछि बैठक आजका लागि सारिएको थियो ।
