काठमाडौँ । सभामुख अग्निप्रसाद सापकोटाले बोलाएको सर्वदलीय बैठक प्रमुख प्रतिपक्षी दल नेकपा एमालेले बहिष्कार गर्ने भएको छ । सोमबार दिउँसो साढे २ बजेका लागि संसदका प्रतिनिधित्व गर्ने दलहरूको बैठक एमालेले बहिष्कार गरेको हो ।
एकीकृत समाजवादीमा सांसदहरु उपस्थित रहने भएका कारण एमालेले बैठक बहिष्कार गरेको जनाएको छ । नेकपा एमालेले एकीकृत समाजवादी पार्टी र नेताहरुलाई वैधानिक मानेको छैन ।
एमालेले लगातार प्रतिनिधिसभा बैठक अवरुद्ध पारेपछि त्यसको समाधान निकाल्नका लागि सभामुख सापकोटाले सर्वदलीय बैठक बोलाएका थिए ।
सभामुखका सञ्चारविज्ञ श्रीधर न्यौपानेले संवाद, छलफल र वार्ताको माध्यामबाट संसद्मा देखिएको समस्या समाधान गर्न बैठक बोलाइएको जानकारी दिए ।
संवादको माध्यामबाट ती समस्या समाधान गर्न सकिनेमा सभामुख विश्वस्त रहेको न्यौपानेको भनाइ छ ।
प्रमुख प्रतिपक्षी दल नेकपा (एमाले) को अवरोधका कारण आजित बनेका सभामुखले चालु अधिवेशनमा बैठक चलाउनै सकेका छैनन् ।
