काठमाडौं- एमालेका महासचिव ईश्वर पोखरेलले पुष्पकमल दाहाल ‘प्रचण्ड’ र माधवकुमार नेपालको गुटबन्दीले पार्टी विभाजन भएको आरोप लगाएका छन् । सुरुमा नेकपा र अहिले एमाले विभाजन यसकै सिलसिला भएको पोखरेलको भनाइ छ ।
कार्यकर्ता भेलालाई प्रज्ञा प्रतिष्ठानमा सम्बोधन गर्दै पोखरेलले राजनीतिक स्थायित्वका लागि पार्टी एकता आवश्यक भए पनि एकता गर्दा धेरै कुरामा ध्यान दिन नसकिएको बताए ।
‘विचारको पक्ष, संगठन, नेतृत्व कमजोर भयो । अन्तरविरोधमा खेल्ने, प्यानलबन्दी सुरु गर्ने नेतृत्व प्रचण्डले माओवादीमा गरे । नेतृत्वमा कहिल्यै चुनिएनन्,’ उनले भने, ‘एमालेमा गुटबन्दी र प्यानलबन्दीको प्रतिनिधि माधव नेपाल बन्नुभयो । माओवादीको संगठनात्मक अराजकता र माधव नेपालको गुटबन्दीबाट एकता र गठजोठ भत्कियो ।’
पोखरेलले राष्ट्रिय राजनीति अहिले दुई ध्रुवमा विभाजित भएको बताए । ‘एउटा ओली नेतृत्वको एमाले हो । जसले आर्थिक विकास र समृद्धिको एजेन्डा बोकेर राष्ट्रिय स्वाधीनता, स्वतन्त्रता, सामाजिक समानता बोकेर, देश बनाउने सपना बोकेर उभिएको छ,’ उनले भने, ‘अर्को ध्रुव दलहरूको गठबन्धन हो । संविधान, कानुन, मूल्य मान्यता नमान्ने, सत्ताको स्वार्थमा केन्द्रीत भएर सबै अापराधिक गतिविधि गर्न तत्पर छ ।’
कुन ध्रुवमा उभिने फैसला गर्नुपर्ने अवस्था आएको छ । ‘ओलीको पोलको वरिपरि गोलबन्द भएर आर्थिक समृद्धि, राष्ट्रिय स्वाधीनता, स्वतन्त्रता देश बनाउने सपना पूरा गर्नुपर्छ,’ उनले भने, ‘गठबन्धनको पोललाई समर्थन गर्न सकिँदैन । त्यसको विपक्षमा उभिनुपर्छ ।’
