प्रमुख प्रतिपक्षी दल नेकपा एमालेका अध्यक्ष केपी शर्मा ओलीले एकीकृत समाजवादी पार्टीका अध्यक्ष माधवकुमार नेपाललाई मच्छरले हात्ती खाएको सपना नदेख्न चेतावनी दिएका छन् ।
आइतवार जारी केन्द्रीय कमिटी बैठकमा ओलीले आगामी चुनावमा एमालेलाई टर्च बालेर खोज्ने कुरा मच्छरले हात्ती खाएजस्तै बताएका हुन् ।
एमाले केन्द्रीय सदस्य निरुदेवी पालका अनुसार ओलीले बैठकमा भनेका थिए – ‘मच्छरले निदाएको बेला सिंगै हात्ती खाएको सपना देख्नु र माधव नेपालले आगामी चुनावमा एमालेलाई टर्च बालेर खोज्नुपर्छ भन्नु उस्तै हो ।’
शनिवार हेटौंडामा आयोजित एक कार्यक्रममा नेकपा एसका अध्यक्ष नेपालले आगामी चुनावमा एमालेलाई टर्च बालेर खोज्नुपर्छ भन्ने अभिव्यक्ति दिएका थिए ।
‘एमाले आगामी चुनावमा टर्च बालेर खोज्नुपर्ने अवस्थामा गइरहेको हेर्दै जानुस् । केपी ओली अहंकारको घोडाबाट खसेपछि गालीगलौजमा लागेका छन्,’ नेपालले भनेका थिए । अध्यक्ष नेपाललाई जवाफ दिने क्रममा ओलीले मच्छरले हात्ती खाएको प्रसंग निकालेका हुन् ।
