काठमाडौं- रुकुमपूर्व पूर्ण खोप सुनिश्चित जिल्ला घोषणा भएसँगै नेपालको ६२ जिल्ला पूर्ण खोप सुनिश्चित भएका छन् ।
सबै बालबालिकाले पूर्णरूपमा नियमित खोप पाएपछि नेपालको कान्छो जिल्ला रुकुमपूर्वलाई पूर्ण खोप सुनिश्चित जिल्ला घोषणा गरिएको हो ।
जिल्लामा जन्मेदेखि १५ महिनासम्मका एक हजार तीन सय बालबालिका र १६ देखि २३ महिनासम्मका नौ सय ३४ बालबालिकाले पूर्णरूपमा खोप पाएका छन । यसअघि जिल्लाका तीनवटै गाउँपालिका पूर्ण खोप सुनिश्चित घोषणा भइसकेका छन् ।
रुकुमपूर्व पूर्ण खोप सुनिश्चित जिल्ला घोषणा भएसँगै लुम्बिनी प्रदेशका १२ वटै जिल्ला पूर्ण खोप सुनिश्चित भएका छन् । यसअघि ११ वटै जिल्लाका सबै बालबालिकाले नियमित खोप पाइसकेका छन् ।
नेपाललाई पूर्ण खोप सुनिश्चित देश घोषणा गर्ने अभियानअनुसार हालसम्म ६२ वटा जिल्ला पूर्ण खोप सुनिश्चित घोषणा गरिएको स्वास्थ्य सेवा विभागले जनाएको छ ।
विभागका अनुसार देशका झन्डै ९० प्रतिशत पालिका पूर्ण खोप सुनिश्चित पालिका भएका छन् । बाल मृत्युदरमा कमी ल्याउन खोपले महत्वपूर्ण भूमिका खेलेको विभागको दाबी छ ।
