सत्तारुढ दल नेपाली कांग्रेसका वरिष्ठ नेता रामचन्द्र पौडेल पक्षले आफ्नो समूहबाट मन्त्री छान्नका लागि बैठक बोलाएको छ । बैठक आज दिउँसो २ बजे पौडेल निवास बोहराटारमा बस्नेछ ।
प्रधानमन्त्री शेरबहादुर देउवा नेतृत्वको सरकारमा सहभागी हुनका लागि यतिबेला सत्ता गठबन्धनका नेताहरुले मन्त्री छान्ने काम गरिरहेका बेला पौडेल पक्षले पनि मन्त्रीको नाम दिनका लागि बैठक बोलाएको हो ।
कांग्रेसले प्रधानमन्त्री र ६ मन्त्रालय पाउने पक्का छ भएको छ । काँग्रेसको तर्फबाट यसअघि नै कांग्रेसबाट प्रधानमन्त्री देउवासहित गृहमन्त्री बालकृष्ण खाँड, परराष्ट्रमन्त्री डा नारायण खड्का र कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले जिम्मेवारी पाइसकेका छन् ।
काँग्रेसको भागमा स्वास्थ्य तथा जनसंख्या, सञ्चार तथा सूचना प्रविधि, महिला, बालबालिका, ज्येष्ठ नागरिक तथा समाज कल्याण मन्त्रालय परेको छ ।
तर काँग्रेसको पौडेल पक्षले भने आफ्नो तर्फबाट एक उपप्रधानमन्त्री पाउनुपर्ने माग गर्दै आएको छ । केही समयअगाडी पौडेल पक्षले आफूले मागेको मन्त्रालय नपाए सरकारमा सहभागी नहुने चेतावनीसमेत दिएको थियो ।
पौडेल पक्षले सुजाता कोइरालालाई उपप्रधानमन्त्री बनाउनुपर्ने कुरा अगाडी सार्दै आएको थियो ।
