काठमाडौँ । सर्वोच्च अदालतको परमादेशबाट प्रधानमन्त्रीमा नियुक्त भएका शेरबहादुर देउवाले हालसम्म पनि मन्त्रिपरिषद विस्तार गर्न सकेका छैनन् । उनले मन्त्रिपरिषद विस्तार गर्न नसक्दा सत्ता गठबन्धनका नेताहरुले नै आलोचना गर्न लागेका छन् ।
अहिले कुन दलले कति मन्त्रालय पाउने भन्नेमा लगभग सहमति भइसकेको छ तर आफ्नो भागमा भनेजति मन्त्रालय नपाएपछि दलका नेताहरु असन्तुष्ट रहेका छन् ।
कांग्रेसमा नेता रामचन्द्र पौडेल समूहले तीन मन्त्रालयमा दाबी गरेपछि सहमति जुट्न सकेको छैन ।
नेता पौडेलले आफ्नो पक्षका ३ जनालाई सरकारमा पठाउने सिफारिस गर्न खोजेको थियो तर देउवाले भने जम्मा २ मन्त्रालय दिने बताएपछि काँग्रेसभित्र असन्तुष्टि पैदा हुन थालेको छ ।
सरकरमा पठाउने नामबारे छलफल गर्न बुधबार दिउँसो नेता रामशरण महतको निवासमा पौडेल समूहको बैठक बसेको थियो । कांग्रेसका भागमा ७ मन्त्रालय परेको हुँदा आफ्नो समूहले तीनवटा पाउनुपर्ने उनीहरुको धारणा रहेको थियो ।
त्यतिमात्र होइन हिजो साँझ प्रधानमन्त्री निवास बालुवाटारमा बसेको बैठकमा पनि उनीहरुले देउवासँग आफ्नो ३ जनालाई मन्त्री बनाउनुपर्ने प्रस्ताव राखेका थिए ।
