नेपाली कांग्रेसका नेता गगन थापाले प्रतिपक्षी दल नेकपा एमालेका अध्यक्ष केपी शर्मा ओलीलाई सन्काहा शासकको उपमा दिएका छन् ।
नेपाल विद्युत प्राधिकरण कर्मचारी संघको कार्यक्रममा बोल्दै थापाले ओलीप्रति लक्षित गर्दै सन्काहा शासकको गिनिज बुकमा नाम लेखाउने रहरका कारण देशको तीन वर्ष खेर गएको टिप्पणी गरेका हुन् । ‘लामो समयको अनुभव पछाडि संविधान ल्याएर नयाँ चरणमा प्रवेश गर्यौं भनेपछि फेरि नेपालले अर्को मौका पाएको थियो,’ थापाले भने, ‘फेरि २०७४ सालबाट एउटा सन्काहा शासकलाई गिनिज बुकमा नाम लेखाउने रहर चढ्दा तीन वर्ष खेर गयो ।’
केही दिनअघि पूर्व प्रधानमन्त्रीसमेत रहेका ओलीले एक सार्वजनिक कार्यक्रममा बोल्दै गिनिज बुकको आधा किताब आफूले गरेको कामबाट नै भरिने बताएका थिए । उनले दुई/दुई पटक मिर्गौला प्रत्यारोपण गरेको प्रधानमन्त्री संसारमा कहीं नभएको बताउँदै आफूले गरेका कामहरूले विश्वरेकर्ड बनाएको दाबी गरेका थिए ।
ओलीको यो अभिव्यक्तिलाई लिएर राजनीतिक वृत्तमा टिकाटिप्पणी शुरू भएको छ । यही क्रममा थापाले ओलीलाई सन्काहा शासक भन्दै आक्रोश व्यक्त गरेका हुन् ।
