प्रधानन्यायाधीश चोलेन्द्र शमशेर जबराको राजीनामालाई बटमलाइन बनाएका सर्वोच्च अदालतमा १५ न्यायाधीशहरू आज तोकिएको इजलासमा उपस्थित नहुने बहाना खोजिरहेका छन् ।
साढे ११ बजेदेखि उनीहरू आन्तरिक छलफलमा बस्ने स्रोतले जनाएको छ । प्रधानन्यायाधीश जबराले बुधवारका लागि ११ इजलास तोकेका छन् । आफूसहित र अन्य न्यायाधीशलाई राखेर उनले तोकेको इजलासमा न्यायाधीशहरू उपस्थित हुनेछैनन् ।
मंगलवार न्यायाधीशहरूको समूहले जबरालाई भेटेरै राजीनामा दिन आग्रह गरेको थियो । जवाफमा जबराले राजीनामा दिने भए विवादमा रहेका सबै न्यायाधीशले दिनुपर्ने, आफू एक्लैले नदिने जवाफ दिएका थिए ।
मंगलवार बीबीसी नेपाली सेवासँग कुरा गर्दै जबराले राजीनामा नदिने बरू महाभियोग सामना गर्न तयार रहेको प्रष्ट पारेका थिए ।
जबराले आज तोकेको इजलासमा बहस गर्न नजाने निर्णय बार एसोसियसनले पहिल्यै गरेको छ ।
सत्तारूढ गठबन्धनमा भाग खोजेको र यसअघिका प्रधानमन्त्री केपी शर्मा ओलीसँग पनि संवैधानिक नियुक्तिहरूमा भागवण्डा गरेको आरोप जबरामाथि छ ।
न्यायालय सुधार समितिले दिएको प्रतिवेदन कार्यान्वयन गर्न नमानेको अर्को आरोप जबरामाथि छ । तर जबराले यी सबै विषयको खण्डन गरिरहेका छन् ।
उनले सडकबाट कसैले राजीनामा माग्दैमा आफू पछि नहट्ने बताएका छन् । आफू विधिसम्मत ढंगले प्रधानन्यायाधीश भएको र विधिसंगत हिसाबले नै हट्ने उनको जिकिर छ ।
अदालतमा न्यायाधीशहरूले नै विद्रोह गरेपछि जबरा यतिबेला गम्भीर मोडमा छन् । उनीमाथि यसअघि न्यायाधीश हुँदा गरेका फैसलाले पनि पीर थपिरहेका छन् ।
कानून तथा संविधानविदहरूले जबराको बहिर्गमन नै उपयुक्त हुने सुझाएका छन् । बिपीन अधिकारी, भीमार्जुन आचार्यलगायतका संविधानविदहरूले जबराको बहिर्गमन हुनु नै उपयुक्त हुने सुझाएका हुन् ।
जबराले स्वतः स्फूर्त रूपमा राजीनामा नदिए महाभियोगको प्रक्रियामा जानुपर्ने पूर्व प्रधानन्यायाधीशको समूहले माग गरेको छ ।
तर महाभियोग प्रक्रियामा जान राजनीतिक दलहरू इच्छुक देखिएका छैनन् । हिजो बसेको बैठकमा प्रधानमन्त्री तथा कांग्रेस सभापति शेरबहादुर देउवाले जबराविरुद्ध महाभियोगमा नजाने आफ्नो निष्कर्ष सुनाएका थिए ।
प्रमुख प्रतिपक्षी दल नेकपा एमालेका अध्यक्ष केपी शर्मा ओलीले परमादेश दिने सबै ५ जाना न्यायाधीशले नै राजीनामा दिनुपर्ने अभिव्यक्ति सार्वजनिक गरिसकेका छन् ।
सत्ता गठबन्धनमा रहेका माओवादी केन्द्र, नेकपा एकीकृत समाजवादी, जनता समाजवादी र राष्ट्रिय जनमोर्चा जबराको विषयमा तै चुप मै चुपको स्थितिमा देखिन्छन् ।
