सर्वोच्च अदालतका न्यायाधीशहरूले इजलास बहिष्कार गरिरहेका बेला प्रधानन्यायाधीश चोलेन्द्रशमशेर जबराले सबै खाले मुद्दाहरूमा आफूसहित अन्य न्यायाधीशहरू राखेर १० वटा इजलास गठन गरेका छन् ।
बन्दीप्रत्यक्षीकरणबाहेक अन्य मुद्दा नतोक्ने भन्दै यसअघि भएको भद्र सहमतिविपरित जबराले सबैखाले मुद्दाको इजलास तोकेका हुन् ।
न्यायालयमा भएको बेथिति समाधानका लागि जबराले राजीनामा दिएर मार्गप्रशस्त गर्नुपर्ने माग उठिरहेका बेला जबराले भने वार की पारको बाटो रोजेका छन् ।
जबराले तोकेको इजलासमा न्यायाधीश जान्छन् कि जाँदैनन् भन्ने अहिलेसम्म खुलेको छैन । तर अदालतमा जबराविरुद्ध १९ न्यायाधीश एकापट्टी रहेका छन् ।
आज तोकिएको इजलासमा जबराले आफूलाई छुट्टै इजलाससमेत पारेका छन् । आफूसँग इजलास सेयर नगर्ने न्यायाधीशहरूको संकेत बुझेपछि उनले आफ्नो छुट्टै इजलास गठन गरेका हुन् ।
प्रधानन्यायाधीशले आफ्नो अलावा दीपककुमार कार्की र नहकुल सुवेदी, मीरा खड्का र कुमार रेग्मी, हरिकृष्ण कार्की र सुष्मालता माथेमा, विश्वम्भरप्रसाद श्रेष्ठ र कुमार चुडाल, आनन्दमोहन भट्टराई र मनोजकुमार शर्मा, आनन्दमोहन भट्टराई र प्रकाशकुमार ढुंगाना, अनिलकुमार सिन्हा र प्रकाशमान सिंह राउत, सपना प्रधान मल्ल तथा बमकुमार श्रेष्ठ तथा तेजबहादुर के सी र मनोजकुमार शर्माको संयुक्त इजलास गठन गरेका छन् ।
यसमध्ये तेजबहादुर केसी र मनोजकुमार शर्माको इजलासमा बन्दी प्रत्यक्षीकरणको एउटा मुद्दा पनि राखिएको छ ।
