नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफूलाई सिध्याउने प्रतिक्रियावादीको षड्यन्त्र रहेको बताएका छन् ।
नेत्रविक्रम चन्द ‘विप्लव’ नेतृत्वको नेकपाका कार्यकर्तालाई माओवादी केन्द्र प्रवेश गराउने कार्यक्रममा बोल्दै उनले प्रचण्डलाई नसिध्याएसम्म पार लाग्दैन भन्दै केही प्रतिक्रियावादी आन्दोलनका उपलब्धी उल्ट्याउने षड्यन्त्रमा रहेको बताएका हुन् ।
पार्टी केन्द्रीय कार्यालय पेरिसडाँडामा बोल्दै उनले भने, ‘अहिले प्रचण्डलाई नसिध्याएसम्म पार लाग्ने रहेनछ भनेर प्रतिक्रियावादीहरुबाट घेराबन्दी भइरहेको छ । प्रतिक्रान्तिकारी दलालहरु अहिले पनि आन्दोलनका उपलब्धि उल्टाउने षडयन्त्रमा छन् । माओवादी आन्दोलन र प्रचण्डलाई नसिध्याएसम्म हुँदो रहेनछ भन्ने देखियो नि ! किरणको पार्टी बन्यो, विप्लवको बन्यो । तर, क्रान्ति सजिलो कुरा होइन । लहड चल्दैमा क्रान्ति हुँदैन ।’
उनले क्रान्ति आफैंमा महान काम रहेको बताए । समाज विकासको नियमजस्तै क्रान्तिको पनि नियम रहेको उनको भनाइ थियो ।
‘नेपालमा पनि हामीले धेरै ठूलो जनसंघर्षको संश्लेषण गर्यौं । नेपाली समाजको अध्ययन गर्यौं । राष्ट्रिय एकताको सूध निकालियो, जनयुद्ध गरेको हो । यो त्यति सजिलै भएको होईन् । वैज्ञानिक निश्कर्षसहित सबे प्रतिभालाई केन्द्रित गर्दै अघि बढाईएको विद्रोह थियो ।’
