भारतको बिहार राज्यको सुपौल बस्ने एक दैनिक मजदूरका नाममा रहेको खातामा करीब १० करोड भारु भेटिएको छ । अचम्म त त्यतिबेला भयो जतिबेला ती मजदूरले आफ्नो नाममा कुनै पनि बैंकमा खाता नरहेको बताए ।
बैंक अफ इन्डिया सुपौल शाखामा उनको नाम र आधार कार्ड नम्बरमा रहेको खातामा १० करोड भेटिएको हो । उनले आफ्नो नाममा जब कार्ड लिन गएका बेला बैंक खाता अनिवार्य पर्ने भएकाले बैंकमा समेत पुगेका थिए । उनको नाममा पहिल्यै एउटा खाता रहेको बैंकका अधिकारीले पुष्टि गरेका छन् ।
बिपिन चौहाननामका ती व्यक्तिको नाम र आधार कार्डको नम्बर जाँचेर हेर्दा खाता उनकै नाममा भएको पाइएको हो । तर उनले आफूले अहिलेसम्म कुनै पनि बैंकमा खाता नखोलेको बताएका छन् ।
उक्त बैंक खाता १३ अक्टुबर २०१६ मा खोलिएको थियो । त्यस खातामार्फत करोडौं रुपैयाको कारोवार पनि भएको देखिएको छ । जबकी बिपीन एक दैनिक मजदूर हुन् र दिनमा मुश्किलले २ सय कमाउँछन् ।
उनले भने, ‘मैले सम्बन्धित बैंक खाताको शाखासँग सम्पर्क गरें र उनीहरूले चेक गरे । त्यसमा सन् २०१७ मा करोडौं रुपैयाँको कारोबार भएको रहेछ । अहिले करीब १० करोड खातामा देखिएको छ । आधार कार्ड मेरो प्रयोग गरिएको रहेछ भने खाता खोल्दा चाहिने बुढी औंलाको छाप र फोटोको बारेमा मैले जानकारी लिएको छैन ।’
उनको आधार कार्ड प्रयोग गरेर खाता खोलिएको देखिएपछि बैंकले उक्त खाता फ्रीज गरिदिएको छ ।
