काठमाडौँ । गायिका समिक्षा अधिकारीलाई बलात्कार गरेको आरोप लागेका पल शाहलाई खोज्न सर्कुलर जारी गरेर हिँडेको प्रहरीले फिल्मका निर्देशक सुदर्शन थापालाई पक्राउ गरेका छन् ।
थापा चार दिनदेखि फरार भइरहेका पलले अभिनय गरेको फिल्म ‘म यस्तो गीत गाउँछु-२’ का निर्देशक हुन्। अहिले सो फिल्म रिलिज भइरहेको छ ।
अहिलेसम्म प्रहरीले पल शाहलाई पक्राउ गर्न सकेको छैन ।
प्रहरीले थापासंग आवश्यक सोधपुछ गरेको बुझिएको छ ।
अधिकारीले शाहविरुद्ध जिल्ला प्रहरी कार्यालय तनहुँमा किटानी जाहेरी दिएकी थिइन् ।
यसअघि जिल्ला प्रहरी कार्यालय, कास्कीमा शाहविरुद्ध जाहेरी दिएकी अधिकारीले त्यहास्थित प्रहरीले घटनास्थल तनहुँ भएकाले तनहुँमै दर्ता गर्न सुझाव दिएको थियो । सोही सुझाव अनुरुप अधिकारीले आज तनहुँ प्रहरीमा उजुरी दिएकी छन् ।
एउटा म्यूजिक भिडियोको सुटिङका क्रममा तनहुँ गएका बेला शाहले फकाएर आफूमाथि करणी गरेको उनको आरोप छ । १८ वर्षभन्दा कम उमेरकी अधिकारीले शाहले आफूमाथि फकाएर करणी गरेको दाबी गर्दै आएकी छन् ।
